Moji sobubratřa z časa w klóštrje – internet nas wjaza

Składnostnje listowanja přez facebook z něhdyšim sobubratrom kongregacije Mariannhillskich misionarow, patrom Christophom Eisentrautom, kiž skutkuje w južnoafriskim centrumje rjada, chcu was někotrych z kruha ludźi předstajić, z kotrymiž sym hišće po mojim wotchadźe z klóšterskeho žiwjenja pak hdys a hdys pak prawidłownje kontakt měł. Pater Christoph je tuchwilu tež wicepostulator w procesu zbóžnoprajenja załožerja kongregacije, abta Franza Pfannera. Wón rěči běžnje zulu a so na to wjeseli, jónu něšto serbske słyšeć.

Najwažniši je dźensniši wiceprowincial němskeje prowincy, pater Siegfried Milz w Würzburgu, wón mi přeco k hodam a narodninam piše. Prowincial je pater Hubert Wendl, kiž je ze mnu hromadźe w noviciaće w bayerskim Reimlingenje był, z nim sym so před lětami w klóštrje w Pančicach a potom hišće raz w Drježdźanach zetkał. Druheho něhdyšeho sobunowicu Jörga Thiemanna sym jónu w Münsteru wopytał, jeho widźiće na stronje putniskeho městna, hdźež smy w cašu nowiciata wospjet pobyli.

A tule je hišće link k patrej Wolfgangej Zürrleinej, našemu mištrej nowicow. Rjenje je było na třoch městnach mojeje přisłušnosće k rjadej Mariannhillskich misionarow, to běchu Reimlingen, Würzburg a Maria Veen. A dźakowano nowiciatej a tehdom 75-lětnemu bratrej Gereonej móžu kokoše z nožom zarězać, a bratr Konrad je mje nawučił, rano stańši z łoža napoł pjećich prosata zastarać. Ženje njewěš, štož zaso jónu trjebaš …