Biskop wita kŕižerjow

Gesendet mit meinem HTC

Přichad biskopa na Radworskim kěrchowje

Gesendet mit meinem HTC

Jutry 2013 w Chrósćicach

Gesendet mit meinem HTC

Baćonscy křižerjo we Łuze

Křižerjo w Budyšinje wotjěchaja

Gesendet mit meinem HTC

 

Budyscy křižerjo so hromadźa

Gesendet mit meinem HTC

Łuhowčenjo na přichad křižerjow přihotowani

Gesendet mit meinem HTC

Jutry 2013 we Łužicy: Daj Bóh zbožo!

… přejemy wšěm křižerjam, kotřiž su nětkole hišće hromadźe ze swójbnymi a přećelemi z přihotami zaběrani. Wšitcy so hibaja za swjedźeń Chrystusa, kiž je z rowa stanył. Tež serbske chorhoje na łubi ležo wostać njesmědźa, wšako chcemy wšudźe, w měsće a we wšěch wjeskach, křižerjow jutře porjadnje witać – tež do Łuha!

Kófer spóznaća – što ludźo woprawdźe čitaja / metoda ewaluacije tež za serbske medije?

Sakske Nowiny dadźa w běhu lět cyłkownje 2.500 abonentam nowiny tak čitać, zo redakcija hnydom zhoni, što ludźi woprawdźe zajimuje. Kóždy wobdźělnik dóstanje kóferk ze smartfonom a pisakom za scannowanje. Dwaj měsacaj dołho maš při zwučenej lekturje nowiny přeco poslednju sadu w artiklach scannować, kotruž sy čitał.

Tute informacije so hnydom přez smartfon do redakcije sćelu. Tak woni wědźa, kotre nastawki sy docyła k wědomju brał a kelko linkow sy w tutych artiklach woprawdźe čitał. Wobdźělnicy su reprezentatiwnje wupytani – prěnjotnje po kriteriju staroby, zo by zestawa scannowanskich čitarjow starobnemu přerězkej cyłeho čitarstwa někak wotpowědowała.

Do toho ma kóždy, kiž sobu čini, štyristronski naprašnik wupjelnić a so na informaciskim zarjadowanju wobdźělić. Sym so za zeleny štwórtk popołdnju w Budyskim hotelu rozsudźił, hdźež potom połdra hodźiny přednošk redaktora-nawody projekta wo wšěch konkretnych prašenjach našeje dźěławosće za polěpšenje wobsaha nowiny słyšachmy.

Tajke něšto by tola tež něšto za naše serbske ćišćane medije (nowiny a časopisy) było – zo bychu wone dokładnišo wědźeli, kotre temy a nastawki su abonentow zajimowali. A što su ludźo potom realnje čitali. – Na zarjadowanju Sakskich Nowin bě tež druhi – młódši – Serb, potajkim smy mjez ca. 25 ludźimi derje dosć zastupjeni byli :-).

Wulki pjatk 2013 w sněze – ćiche rozmyslowanje wo kulturje dowěry a njedowěry w Serbach

Z woknom won hladajo widźiš, zo najzymniši nalětnik wšěch časow na kóncu sčasom do jutrow hišće wjele sněha přinjese. To znajmjeńša dołholětnemu prawidłu wotpowěduje: Hody 2012 smy pře wšu měru miłe wjedro měli, susodźa su patoržicu grilowali, a nětkole nas k jutram to nawopačne wočakuje. Njedźiwajcy toho přeju křižerjam dobre přihoty a jim palcy tłóču, zo budźe jutrowńčku snadź tola něšto stopnjow wjac …

Wulki pjatk je tež ćichi pjatk. Najwjetši čas za rozmyslowanje wo rěčenju a mjelčenju. Cyły tydźeń je w medijach wjele kritikow redakcije Serbskich Nowin, zo njejsu delegaća hłowneje zhromadźizny dosć diskutowali. Bě pak mjez druhim wjacorych přinoškow k šmórnjenju župneje pawšale, pobrachowacemu młodźinskemu koordinatorej a zakónčenju debaty wo sejmiku. A k wšěm druhim palacym prašenjam je so předsyda Domowiny w swojej narěči wuprajił – a hdyž wón potom při wólbach 96,5 procentow hłosow dóstanje, rěka to wočiwidnje, zo ludźo jeho analyzy a zaměram přihłosuja.

Na stronskich zjězdach knježi njepočink, zo chcedźa so wšitcy kandidaća za wšelake gremije do toho w generalnej debaće słowa jimać, zo bychu tak za sebje wabić móhli. Potom wěmy, zo je kóždy za měr, socialnu sprawnosć, dobru komunikaciju a chce so wězo z połnej paru za lěpši swět zasadźować. Nětk so Serbske Nowiny na tym postorkuja, zo tajke něšto wobćežneho w Domowinje z wašnjom njeje – bohudźak!

Samo mi připućowarjej su nimale wšitcy kandidaća znaći byli – wěm, čehodla jednych wolu a druhich nic. A ći, kotřiž su mje wolili, su sej něšto při tym myslili, a ći, kotřizž njejsu mje wolili, tohorunja. Zmysł narěčow njeje, zo kóždy k wšemu něšto do swěta pušći, ale zo su wone z nastorkom za tworjenje aktualnych a přichodnych rozsudow. Hłowna zhromadźizna njeje talkshow a Domowina njeje debatowanski klub. Smy cyły dźeń wuradźowali a wothłosowali – štóž chce to w nocy při piwje abo winku pokročować, ma swobodu to činić.

K směcham pak su poroki z erta ludźi, zo pozdatnje njebě dosć čiłeje diskusije, kotřiž sami njejsu so słowa jimali. To samsne płaći za wumjetowanje, zo je Domowina něšto wopačne wobzamknyła, z pjera muža, kiž njeje k hłownej zhromadźiznje přišoł.

So wě, zo sym jako kandidat za wšě pady na to přihotowany był, sebje samoho předstajić a prajić, što chcu wosebje k dźěławosći zwjazkoweho předsydstwa přinošować. Po pjeć lětach a hladajo na stajnje stupacu ličbu čitarstwa bloga Piwarca móžu tak a tak wot toho wuchadźeć, zo ludźo wědźa, što ja chcu. Wšěch młodych kandidatow z Delnjeje Łužicy wězo dotal wosobinsce znał njejsym, ale mějach dowěru k župje, zo su woni nam dobrych ludźi pósłali, a tohodla sym jich mjena nakřižował.

A tež tajka dowěra k intaktnej demokratiskej kulturje słuša. Na njedowěrje móžeš drje zwady  natwarjeć, ale nic kooperaciju. Hdyž knježi w swójbje njedowěra, je cyła zhromadnosć skažena. Tohodla njesměmy na posołow njedowěry poskać, přetož jich poselstwo je rozkora. My pak chcemy na kóncu debatow kreatiwny konsens namakać.