Fantom „mocy“ přichodneho „serbskeho“ sejmika

Što zhonja Němcy přez němskorěčne wudaće Serbskich Nowin wo aktualnej debaće wo „serbskim sejmiku“? Zo su wot předsydy Domowiny Dawida Statnika namjetowane prawólby wjednistwa rěčnicy Serbow „kleines demokratisches Schmankerl““, haj „neo-koloniale Strukturen“. Awtorka piše wo „pseudo-mocy“ třěšneho zwjazka Serbow a němskich knježerstwach, kotrež dale wšo kontroluja. Tohodla so wona „serbskeho nalěća“ po přikładźe arabskeho nadźija – nawjazujo na iniciatiwu „serbski sejmik“.

Potajkim kampanja „njewotwisneho wječornika za serbski lud“ dale dźe, hačrunjež je serbski lud z njepřitomnosću za „kulojtym blidom“ sejmikarjow pokazał, što wón na tónle projekt dawa. „Móc“ je wotwisna wot suwerenity, wo wobjimje pjenježnych srědkow a jich nałožowanju rozsudźić směć. Nichtó dotal wobkrućił njeje, zo by – (hladajo na „kulojte blido) tak a tak najskerje němcowacy – „serbski sejmik“ sam postajić móhł, kelko (!) pjenjez jemu k dispoziciji steji. Tohodla je tež „móc sejmika“ ryzy fantom.      

Kaž prajene: Wjace skutkownosće serbskeje politiki je trjeba – ale štóž chce to přećiwo realnemu třěšnemu zwjazkej Serbow z fiktiwnym „sejmikom“ docpěć, njedopomha Serbam k wjac „mocy“.

Budźe ptači kwas ze swětowym kulturnym herbstwom?

Sakska statna ministerka za wědomosć a wuměłstwo, Sabine von Schorlemer (bjezstronska), je so w dźensnišim wudaću Sakskich Nowin indirektnje za to wuprajiła, zo budźe serbski nałožk ptači kwas ze swětowym kulturnym herbstwom. Sakska přihotuje tuchwilu swój přinošk k lisćinje namjetow Němskeje za imaterielne swětowe kulturne herbstwo. Swobodny stat smě dwaj namjetaj předpołožić. Na prašenje redaktora Bernda Klempnowa, hač by ptači kwas pódla być móhł, je ministerka wotmołwiła: „Čehodla nic? Rjana předstawa to je.“

 Interview w SZ (bohužel jenož abonentam abo za popłatk přistupny)

Wrótna „normalita“

Dale a wjac hólcow je pozdatnje hyperaktiwnych – cyła generacija dźěći je jako nošerjo ADHS wuwołana. Mjeztym samo chorobna kasa před diagnozami lěkarjow warnuje. Bohudźak smědźachmy my w młodych lětach prosće „normalni“ być – bjez njeličomnych ekspertow, kotřiž chcedźa krok po kroku cyłu ludnosć choru pisać… Přeju sej, zo bychmy sej w Serbach dale wěstu čłowječu „normalitu“ wobchowować móhli, to by rjany přikład za sebjewědmnu awtochtonu kulturu był.

A nětk hišće jako absolutny wjeršk aktualneje politiskeje komunikacije snědań z knjezom Brüderle a wonej žurnalistku redakcije „stern“, kiž chcyše z nim před lětom w połnocy při barje bledźić a nětk zjawnosć wo tym informuje, zo je wón jej tehdom po x-tej škleńcy wina hladajo na jeje figuru bayersku šaćik doporučił. Hdyž je mój nan jako reporter „stern“ po cyłym swěće po puću był, dźěše wo žiwjenje a smjerć we wójnach, nětk po jednym lěće (!) wo snadź kusk njelepy flirt. Jeli chutniše problemy nimamy :-).

Kónc a započatk

Iniciatiwna skupina a Domowina stej so faktisce přezjednaj, zo je reformy zastupnistwa serbskich zajimow trjeba – hlej tež aktualnu raznu kritiku zwjazkoweho předsydstwa na załožbowej radźe. Zo chcedźa sejmikarjo dialog z hłownej zhromadźiznu Domowiny, by k „nowozapočatkej” přinošować móhło. Je najwjetši čas za kónc dotalneje konfrontacije.

Snadna rezonanca  „kulojteho blida” w Smochćiach njedźiwajcy njesměrnje wjele wabjenja je jasnje znazorniła: Masa Serbow, kotraž so wot Domowiny porjadnje zastupowana njezačuwa, njeeksistuje. Kriza legitimacije třěšneho zwjazka je fantom. A namjetowany wólbny modus, kiž by ze serbskeho sejmika łužiski regionalny parlament sčinił, njenamaka w Serbach podpěru relewantneje ličby ludźi.

Za wjac demokratije w Serbach a wjac skutkownosće serbskeje politiki pak njemóže přewjele idejow być. Na blidźe leža hižo prawólby w Domowinje – namjet jeje předsydy Dawida Statnika. A tež wo idejach sejmikarjow ma so bjez blokadow woměrje diskutować – ale prošu přichodnje bjez njewěcownych atakow na wolenych Serbow w němskej zjawnosći!

Rjany wječor w Chrósćicach, ale ptači kwas klětu prošu jara zaso kusk hinak!

Sym drje přiwisnik „lochkosće byća“, ćežkomyslnosć njetrjeba być. Je dosć problemow na swěće, humor je na jewišću elementarny srědk za wuměłske předźěłanje reality. Ale prošu bóle na niwowje „heute-show“ a nic kaž w operetce „Im Weißen Rössl am Wolfgangsee“. Serbski ludowy ansambl je so lětsa za operetku jako ptačokwasny program rozsudźił, tohodla bě objektiwnje jasne, zo ja tak subjektiwnje zahorjeny być njemóžu kaž loni.

So wě, zo je ptači kwas SLA w Chróšćanskej „Jednoće“ sobotu wječor zaso towaršnostny wjeršk był. Po bohudźak nic předołhim programje 🙂 móžachmy z lubymi ludźimi rjenje bjesadować, wjele hosći je dźakowano skupinje „Taifun“ a Měrćinej Weclichej składnosć k rejam wužiwało, a ja sym sej w předrumnosći dobre pomfritki popřał. Bjez poskitka wječorneho ptačokwasneho programa njeby k tomu dóšło, a to by tola woprawdźe jara škoda było!

Zala Cyžowa, jeje fanam přez Chróšćanske lajske dźiwadło dawno znata, je so doskónčnje ze swojej rólu korčmarki „Marje“ jako kult-dźiwadźelnica etablěrowała. Program bě trojorěčny, ale nałožowanje serbskeju rěčow kusk samowólne. Nimo toho kóždy Serb drje druhu serbsku rěč někak rozumi, ale nic kóždu pointu… A připódla: „Žortny“ kruch njerěka reprodukowanje wšěch starych klišejow wo žonach a mužach. Potajkim klětu zaso hinak!

Iniciatiwna skupina praji: „Wuspěch za kulojtym blidom“

Hlej tule rozprawu a fota:

http://www.lausitznews.de/pressebericht_9452.html

Z dźensnišeho posedźenja Zwjazkoweho předsydstwa Domowiny

Zwjazkowe předsydstwo Domowiny wuradźowaše dźensa pod nawodom předsydy Domowiny Dawida Statnika w Budyšinje. Spočatnje informowaše předsydka załožboweje rady, Lejna Theurigowa, wo wčerawšich wobzamknjenjach rady. Zwjazkowe předsydstwo wza skrotšenje pawšalneho spěchowanja institucijow kritisce na wědomje. Přez změnu požadanja srědkow na załožbu nastupajo župnu pawšalu powjetši so na njezrozumliwe wašnje běrokratija. Dołhož njejsu strukturne rozsudy w załožbowej radźe zrjadowane, wupraji so zwjazkowe předsydstwo přećiwo zawrjenju regionalnych běrowow Załožby za serbski lud.

Zwjeselace je wobzamknjenje załožboweje rady, kiž dowola předsydźe Domowiny cyłodnjowske dźěło za narodnu organizaciju. 16. hłowna zhromadźizna Domowiny, kiž budźe dnja 23. měrca we Wjerbnje, woli noweho předsydu, městopředsydow a tamnych čłonow zwjazkoweho předsydstwa. Z hłowneje zhromadźizny maja tež impulsy za nowy program “Domowina 2025” a za diskusiju wo změnje wólbneho modusa zwjazkoweho předsydstwa wuchadźeć. Zwjazkowe předsydstwo doporuči, projektowe městno internetoweje agentury do nošerstwa RCW zarjadować. Namjet měł so přez čłonow załožboweje rady do gremija zapodać.

W tajnych wólbach wuzwoli zwjazkowe předsydstwo dźensa jako čłonow mytowanskeho wuběrka Domowiny za dobu 2013 do 2017: Brigitu Šraminu, Měrka Pohonča, Marhatu Korjeńkowu, Trudlu Kuringowu, Jana Macku, Adelheid Dawmowu, Alojsa Wjeselu, Boženu Braumanowu a Leńku Thomasowu. Zdźěla samsneje ličby hłosow dla běchu tři wothłosowanja trěbne. Dale wobzamknychu dźensa, zo płaća direktni čłonojo-jednotliwcy Domowiny 20 € přinoška lětnje. Potrjeba tole rjadować pokazaše so přez próstwu jednotliwca, do Domowiny přistupić, tak kaž so wone po wustawkach třěšneho zwjazka zmóžni.

(Nowinska zdźělenka Domowiny)

„Lodowa doba“ mjez Domowinu a sejmikarjemi – taće budźe hakle po kóncu projekta pycharstwa

Lětuša „lodowa doba“ so drje pozdatnje nachila, hdyz maja wjedrarjo ze swojimi prognozami zajutřišeho taća prawje. Ale najprjedy je kruty zmjerzk swoj wjerški docpěł: Wčera nawječor do wjeski přišedši sym na termometrje awta minus 17 stopnjow wuhladał. Njedźiwajcy toho bě zady polow něšto ludźi na kromje Łuha, kotřiž su na přeprošenje dobrowólneje wohnjoweje wobory hromadźe swoje stare hodowne štomy spalili.

W Serbach je w přenjesenym zmysle lodowa doba w komunikaciji mjez iniciatiwnej skupinu za serbski sejmik a třěšnym zwjazkom Serbow, Domowinu. Tohodla stej jeju dźensnišej zarjadowani wo přichodźe serbskeho ludu wot so dźělenej. Hač budźe jónu taće, jeničce na sejmikarjach zaleži.

Woni su dołhu „zymnu wójnu“ přez wulke medije přećiwo zastupjerce małeho ludu wjedli myslo, zo by so wona něhdy tutomu ćišćej kłoniła a rěčnikam małeje skupiny hołdowała. Woni su sej žadali, zo přichodnje 800.000 Łužičanow wo dóńće někotrych dźesaćitysac Serbow rozsudźi. Tón projekt pycharstwa móže jenož poražku poćerpjeć. To je pokročowanje zwrěšćeneho NDRskeho modela, zo su Serbja skromny dźěl wjetšeho cyłka – prjedy wšěch dźěłaćerjow a burow a nětk postajeni wot němskeje wjetšiny Łužicy.

Tohodla hladam z woknom swojeje dźěłarnje won do měrniweje lodoweje doby rjaneje Łužicy a sym połnje nadźije, zo so takrjec kolektiwny rozum serbskeho ludu zaso jónu přesadźi – kaž hižo sta króć we wjac hač tysac lětach. Hewak njeby w 21. lětstotku hižo Serbow było, wšako su wuměnjenja za jich byće a traće hustodosć přewšu měru komplikowane byli. K tutej strategiji přežiwjenja słuša, spektakularne pačenje serbskeho ludu a zjawne wudrěwanje swójskich ludźi wotpokazować.

Jeli „sejmkarjo“ to jónu rozumja, budźe taće w komunikaciji mjez nimi a Domowinu :-).

Za produktiwne Serbstwo zhromadneho dźěła

Štóž na tónle klinkačk tłóči, nima ani skónčne šulske wuswědčenje ani powołanske wukubłanje. W Lipsku jedyn ze sydom šulerjow bjez wotchadneho wuswědčenja do dalšeho žiwjenja startuje. Tule je tuchwilu produkciska šula, kotruž smy wčera wječor wopytali, po statistice najwuspěšni poskitk: Kaž stej nawjedowacej wučerce rozkładłoj, wuknu młodźi ludźo socialnu a powołansku kompetencu najlěpje „w praktiskim zhromadnym dźěle“.

Tak je na přikład młody muž ruskeho pochada wukubłanske městno w awtodźěłarni sposrědkowane dóstał. Mjeztym je jemu dźěłodawar karieru jako běrowoweho překupca zmóžnił, přetož móže wón z kupcami rusce jednać a zrěčenja w ruskej rěči formulować. W srjedźišću produkciskeje šule, kotraž wuči swojich klientow ze zwoprawdźenjom nadawkow za wičnohospodarskich nadawkidawarjow, steja konkretne jednanje, tworjenje wěckow, kotrež móžeš přimać a sej wobhladować.

Serbstwo je druhdy a z městnami w krizowym stawje, a wosebje młodostni so prašeja, kak dale póńdźe ze serbskosću w swojim žiwjenju. Recept z Lipska płaći tež za Łužicu: Praktiske a konkretne zhromadne dźěło, kotrehož wupłody móžeš widźeć a słyšeć, je za serbske žiwjenje to najwažniše. Hromadźe spěwać, rejwać, dźiwadło hrać, basnje a bajki pisać, kulturne zarjadowanja wotměwać atd. je produktiwniši puć hač wšě debaty wo wšelakich manifestach.

http://www.produktionsschuleleipzig.de/start.html

Ptači kwas!

Pola ludźi je prěnje dźěćo dźensniši dźeń hustodosć hižo do kwasa narodźene – a tohodla je tež do ptačeho kwasa wjele młodźatow widźeć :-). Małe ptački su něžne a słódke – předwjeselo je najrjeńše, tohodla čakamy hač do pjatka, a potom rěka: Ptači kwas w Lipsku!