Za naslědnu dobu po kóncu 2plus

Rady so praji: Serbske dźěći su přichod serbskeho ludu. To trjechi, jeli (!) je zhromadnje jako „serbske dźěći“ wobhladujemy a hladamy – a nic jenož jako žiwe předmjety pedagogiskeho systema rěčnych skupin. Tohodla njeje zmóžnjenje takrjec techniskeje němsko-serbskeje dwurěčnosće hišće kubłanje w narodnym duchu. To tež kóždy Serb na přirodne wašnje wě.

Bohužel bu minjene lětdźesatki te „płuwanje w swójskej jušce“ lěto a bóle difamowane. Kóždy rěčnokulturny cyłk trjeba pak nimo wotewrjenosće swětej wěste wotmjezowanje wot druhich. Pokročowace přeněmčenje serbšćiny a woteběranje serbskeje komunikacije stej z sćěhom zničenja zjawnych serbskorěčnych rumow.

Serbskej duch a duša trjebatej swój „biotop“. Serbske dźěći maja prawo, tež zwonka staršiskeho domu wšědny dźeń njemylenu zhromadnosć ze serbowacymi towaršemi dožiwjeć móc. Přesadźenje serbšćiny jako wobchadnu rěč njeje ničo separatistiske abo ekstremistiske, kaž hybridologojo prěduja, ale poprawom narodna normalita.

Tuchwilu smy hišće we wuwzaćnym stawje. To nima ničo z małymi ličbami činić, ale z pobrachowacym sebjewědomjom. Serbowacy Serbja maja wjac dźěći hač němscy susodźa. Tohodla budźe nam so radźić, wšěm serbskim dźěćom kubłanski wobswět organizować, kiž je woprawdźe serbski.

Kóžde stejnišćo šulow ma so ze swojim přinoškom k „jušce“, w kotrejž dawa so stajnje płuwać, legitimować. Někajka dwurěčnosć hdys a hdys – to njemóže naš zaměr być. Tule dźe wo serbskosć. Je dosć staršich, dźěći, młodostnych a wučerjow, kotřiž to tak widźa. A chcedźa. Wšitcy su tohodla přeprošeni, naslědnu dobu po kóncu hybridneho 2plus-modela tworić.

Sprěnja za tych, kotřiž chcedźa wysoki maćernorěčny niwow nawuknyć (jadro Serbstwa, wšojedne kotreho pochada) a zdruha za tych, kotřiž su z kusk serbskeje rěče a kultury spokojom. Bjez prěnich pak njebudźe Serbstwa, tohodla maja woni w srjedźišću stać.

ZAPŁAĆ BÓH, KNJEŽE BISKOPJE! Serbske wosady wostanu – „wosebity puć“

https://www.freiepresse.de/NACHRICHTEN/SACHSEN/Pfarreien-in-sorbischem-Siedlungsgebiet-bis-2025-sicher-artikel10012487.php

Kaž je biskop na přijeću slubił (Piwarc rozprawješe), tak wón nětko jedna – wón přizwola Serbam "wosebity puć" za zdźeržerjenje našich serbskokatolskich wosadow.

Wotmołwa Serbow na nowy politiski swět? Prošu sebjewědomje z jednym hłosom!

Nutřkownoserbske wubědźowanje wo najlěpše zwiski k „wyšnosći“, wšojedne hač w zarjadach abo w politice, je po wuslědkach wólbow poslednju njedźelu za stareho Frycu. Dotalny establishment je na hrački stajeny, prawicarskonacionalistiska strona je najsylniša –w Sakskej a z hišće wjetšim předskokom we Łužicy.

Hladajo na to, zo Sakska daloko wot přerězka po cyłej Němskej wotchila, njetrjebamy so bledźenju wo „zwjazkowym trendźe“ přizamknyć – pola nas skutkuje přidatny sylny krajny a regionalny trend. Axel Arlt je k tomu, štož konkretnje Budyski wokrjes nastupa, we wčerawšich Serbskich Nowinach wšo pisał.

Tohodla su zamołwići krajneje politiki wjacorych stron tuchwilu takle poraženi, wšako ma wjele ludźi za prawdźepodobnje, zo móhli nam wólby do krajneho sejma za dwě lěće podobne poměry wobradźić. Zwučene mustry komunikacije su zwrěšćene. So z ministrom prezentować a pisane banćiki přetřihać, štož so potom jako wulke foto w regionalnej nowinje pokazuje, hižo nikomu njepomha.

Ta při aktualnych wólbach najsylniša strona Sakskeje a Łužicy dotalny system prawow mjeńšiny wotpokazuje, dokelž widźi z tym wjetšinu diskriminowanu. Njewěrju, zo móhli tomu z argumentami wotpomhać, přetož je to jadro jich politiskeho nahlada. Ćim wažnišo pak je, druhe partnerstwa ze zastupjerjemi wšelakich stron pěstować – a to prošu z jednym hłosom.

Mamy „sejmikarjow“ mjeztym jako čłon resp. fachowca wuběrka w swjojej dźěłöawosć zwjazkoweho předsydstwa Domowiny tak a tak integrowaneju. Na posedźenju ZP w Chrósćicach je dalši zastupjer „sejimika“ wo přichodnym postupowanju iniciatiwy informował a sej přał, zo budźemy so z jich namjetami zaběrać. Mam za to, zo budźemy to w dialogu činić.

Stejišćo Domowiny k wuslědkam wólbow Zwjazkoweho sejma

Domowina wza wuslědki wólbow Zwjazkoweho sejma wosebje we Łužicy z wulkej starosću na wědomje. Z AfD je jedna strona wjetšinu hłosow docpěła, kiž je na naše žadanje, z awtochtonymi narodnymi mjeńšinami runoprawnje wobchadźeć, wotpokazujo reagowała. Nimo toho skedźbnjamy na rjad wuprajenjow wodźacych politikarjow AfD, kiž so po našim měnjenju njekryja ze Zakładnym zakonjom. Čłowjeska dostojnosć njesmě so ranić. Nichtó njesmě so dla swojeho splaha, roda, rěče, domizny a pochada, swojeje wěry, nabožnych abo politiskich nahladow dla wróćostajić abo lěpšiny z toho měć. To je za nas zakład našeje zhromadnosće, měra a sprawnosće.

Napominamy politisce agěrowacych, zo by to z wobsahom jich politiki w přichodnych lětach było. Zwěsćamy, zo je so wosebje w serbskich gmejnach Zarjadniskeho zwjazka “Při Klóšterskej wodźe” hinaši wólbny wuslědk docpěł. Tu AfD njeje najsylniša strona.

Ciwilna towaršnosć we Łužicy steji před wulkim wužadanjom, kotremuž budźemy so zhromadnje z našimi partnerkami a partnerami stajić. Protest njemóže być wobsah na přichod a na dobro našich wnučkow wusměrjeneje politiki.

Na wólbnych forumach a we wotmołwach na naše wólbne kopolaki je so pokazała wulka wobsahowa přezjednota z politikarkami a politikarjemi wšelakich stronow, kiž nětko w Zwjazkowym sejmje Łužicu zastupuja. Z nimi chcemy hromadźe dźěłać.

(NOWINSKA INFORMACIJA)

Marko Kliman jednohłósnje wot krajneho sejma woleny

Dźensa steja Chrósćicy w srjedźišću swobodneho stata: W Sakskich Nowinach jako přikład cyłemu krajej. W sakskim parlamenće, hdźež bu Chróšćan wjesnjanosta Marko Kliman jako zastupjer Zwjazka sakskich městow a gmejnow do Rady za serbske naležnosće woleny – jednohłósnje 😊! Gratulaciju! 🖒

NOWINSKA INFORMACIJA DOMOWINY

Gratulacija k wuzwolenju jako čłon Serbskeje rady Sakskeje

Domowina wita dźensniši rozsud Krajneho sejma Sakskeje a gratuluje Markej Klimanej k wuzwolenju jako čłon Serbskeje rady Sakskeje. Wón bu namjetowany wot Sakskeho zwjazka městow a wsow a Domowiny – Zwjazka Łužiskich Serbow.

Marko Kliman, w lěće 1981 rodźeny, je čłon CDU a z lěta 2015 wjesnjanosta gmejny Chrósćicy. 2017 bu wón na namjet župy “Michał Hórnik” Kamjenc na hłownej zhromadźiznje Domowiny jako čłon zwjazkoweho předsydstwa woleny.

http://www.domowina.de/hsb/domowina/zwjazkowe-predsydstwo/clonkiclonojo-zp/

Dokal po politiskim zemjerženju? Za mudru wotmołwu na „módru“ Łužicu

Łužica je wotnětka politisce dospołnje „módra“ – AfD je nimale wšudźe najsylniša strona a jeje direktnaj kandidataj zastupujetaj wokrjesaj Budyšin a Zhorjelc w zwjazkowym sejmje. Ze swojimi hłosami je ludnosć wuchodneje Sakskeje nadpřerěznje k tomu přinošowała, zo tuta prawicarskonacionalistiska strona po cyłej Sakskej na prěnim městnje steji. Tući direktnje woleni AfDnicy (Sakska Šwica je tamle pódla) a tón krajny wuslědk su po cyłej Němskej jónkrótne. To wězo dołhodobnje image našeho regiona wobwliwuje.

Ludnosć serbskeho kraja je hinak wothłosowała: W tak mjenowanych jadrowych kónčinach njeje AfD dominantna a wjac hač dźesać procentow słabša hač po cyłej Łužicy. Nješkodźi nahladnosći serbskeho ludu, tónle markantny rozdźěl na runinje nadregionalneje komunikacije wuzběhować.

Wólby do zwjazkoweho sejma běchu we Łužicy politiske zemjerženje – ničo hižo njebudźe kaž do toho. Generalny sekretar sakskeje unije, naměstnik předsydy CDU w parlamenće Němskeje a dotal najwuhladniši móžny naslědnik ministerskeho prezidenta, Zhorjelski zapósłanc Michael Kretschmer, njebudźe hižo čłon zwjazkoweho sejma. Tež w Budyskim wokrjesu njeje hižo politiski personal zwjazkoweje politiki CDU prezentny. Běrtlk lětstotka najmóciniša strona je we Łužicy politisce „wotćena“, bjez hłowy. Dokelž je jeničce na direktneju kandidatow sadźiła.

Sadźmy so, zo njebudźe so Marko Šiman 2019 znowa wo mandat w krajnym sejmje prócować a zo njebudźe Stanisław Tilich načolny kandidat CDU we wonych wólbach? Prěni by dyrbjał so bojeć samsneho dóńta kaž Klausa Brähmig ze Sakskeje Šwicy, kiž bě wot 1990 zapósłanc a bu nětko wotwoleny. A Tilich by swoje dotalne wólbne wuspěchi z dalšej kandidaturu na hrački stajił. Ale budźemy widźeć, snadź budźetaj zmužićišej hač sej myslach.

Čehodla je „Łužica“ tak woliła, njech so woměrnje analyzuje. Pawšalne twjerdźenje, zo tule „socialnje wotpójsnjeni“ protestuja, tak powšitkownje njetrjechi. Hdyž dóstawa AfD tež tamle, hdźež mjenje abo bóle wšitcy we wulkich domach bydla a wulke awta na dworje stejo maja, přihłosowanje kaž ludowa strona, potom dźe skerje wo motiwy „kulturneho“ razu. A to je nětko jara złahodnjenje prajene.

Politiska konsekwenca za Serbow: W zwjazkowym sejmje je naš region nimo wot AfD nětko ze štyrjomi zapósłancami zastupjeny, to je Caren Lay (Lěwica), Thomas Jurk (SPD), Torsten Herbst (FDP) a Stephan Kühn (Zeleni). Wosebje Jurk (wokrjes Zhorjelc) a Lay (wokrjes Budyšin) staj tež wosobinsce we Łužicy zakótwjenaj. A wólbny forum resp. wotmołwy na wólbne kopolaki Domowiny su pokazali, zo móžemy z nimi wšěmi na dobro Serbstwa kooperować. To by mudra wotmołwa na „módru“ Łužicu była. A mjez nimi budźetej z wěstosću přichodnje knježaca wjetšina a opozicija zastupjenej .

http://www.dnn.de/Specials/Themenspecials/Bundestagswahl-2017-in-Dresden/Die-Direktkandidaten-im-Dresdner-Umland/AfD-holt-drei-Direktmandate-in-Sachsen-und-wird-staerkste-Kraft

AfD w Serbach druha najsylniša strona – CDU je třećinu wolerjow zhubiła

Wuslědki w gmejnach zarjadniskeho zwjazka Při Klóšterskej wodźe

Chrósćicy: CDU 47,2 % (minus 18) – AfD 20,3 – Lěwica 9,5 – FDP 9,5 – SPD 5,2 – Zeleni 3,2

Njebjelčicy: CDU 41,9 % (minus 25) – AfD 23,3 – FDP 10,5 – Lěwica 7,0 – SPD 6,9 – Zeleni 2,9

Pančicy-Kukow: CDU 47,4 % (minus 19,7) – AfD 18,8 – FDP 8,6 – Lěwica 7,5 – SPD 7,0 –Zeleni 3,7

Ralbicy-Róžant: CDU 44,8 % (minus 23,5) – AfD 23,3 – FDP 10,2 – Lěwica 7,5 – SPD 5,8 – Zeleni 2,8

Worklecy: CDU 43,2 % (minus 24,3) – AfD 25,2 – Lěwica 8,4 – SPD 7,0 – FDP 5,9 – Zeleni 5,031,4

Porno susodnym gmejnam je CDU w jadrowych kónčinach dale najebać hoberske straty najsylniša strona. Hewak to w našich kónčinach hinak wupada: AfD je městno najsylnišeje strony zabrała, samo w Kamjencu: (31,1 %, CDU 24,1, Lěwica 18,2). Wuwzaće je Kulow: CDU 41,4 %, AfD 28,2 (Lěwica 8,6). W Radworju pak je AfD dobyła: 36,3 %, CDU 31,4 (minus 24,2), Lěwica 9,5, FDP 7,6, SPD 6,3, Zeleni 2,4.

W Njeswačidle, něhdyšim historiskim centrumje ewangelskich Serbow, je CDU połojcu swojich procentow přisadźiła (město 49,1 hišće 24,4 %), AfD ma nětkole nimale 41,7 procentow (Lěwica 10,9). Tež we Łazu, hdźež bě serbski narodny prćowar Zejler z fararjom, je AfD z 35,9 procentami z wulkim wotstawkom před CDU (27,3), Lěwica: 13,6. W Bóšicach, hdźež amtěruje serbski wjesnjanosta, je AfD tohorunja najsylniša strona: 37,2 procentaj – CDU su 31,3 procenty wolerjow swój hłós dali (Lěwica 10,2). Hodźij nas prócowanja wo serbsku wučbu dla tež zajimuje, tule podobnje wupada: Na prěnim městnje AfD (34,9 procentow), CDU 28,4 (minus 20,5 procentow). Na třećim městnje Lěwica (11,3). Rakecy: AfD 36,7 %, CDU 26,6, Lěwica 12,1.

A wólbny wokrjes Budyšin I zastupuje přichodnje w zwjazkowym sejmje  Karsten Hilse (AfD), kiž docpě 33,2 procentaj. Kandidat CDU Roland Ermer je z 30,6 procentami zwrěšćił.

Wuzwolenej wuslědkaj ze Zhorjelskeho wokrjesa

Slepo: AfD 36,1, CDU 27,4 % (minus 20,6), Lěwica 12,1, SPD 9,3, FDP 6,1, Zeleni 2,8.

Trjebin: AfD 36,7 %, CDU 28,8 (minus 23,3), Lěwica 12,0, SPD 11,9, FDP 2,8, Zeleni 1,9.

Zaměr kubłanja: doma być

Awtochtoni kaž Serbja su eksperća domizny. Woni wědźa, što to woznamjenja, tule doma być, wšako běchu takrjec hižo přeco tu. Z tym su woni tohorunja na polu kubłanja w našej dobje tajke něšto kaž rodźena elita. Kak móže to być?

W starych časach běše kubłanje duchowna cyroba za puć do swěta: Zdźěłany čłowjek měješe swobodu, tón blečk zemje, hdźež jeho kolebka steješe, wopušćić a něhdźe druhdźe karjeru činić. Dźensa dunda kóždy wot ranja do nocy ze swojim smartfonom po swěće, analfabeća namakaja z mobilnym telefonom wšě puće a jězba z Łužicy do Afriki je hrabnjenčko, kotrež móžeš ducy z dźěła domoj we wobchodach w Budyšinje knihować.

Ale při sebi a w swojej domiznje wostać móc je dźensniši dźeń zaměr wuspěšneho kubłanja. To je swoboda 21. lětstotka: najebać globalne prudy a wětřiki centrum swojeje wosobinskeje syće tamle zakótwić, hdźež sy doma.

Tohodla je wšojedne, hač tysac abo milion ludźi na twojej rěči podźěl bjerje – hdźež sy doma, tamle je twój pupk swěta. Wězo je dobry argument za serbšćinu, zo so ze słowjanskimi swětom dorozumić móžeš. Najwažniša jeje lěpšina pak je, zo je serbšćina rěč našeje domizny. Němčina je ta druha rěč. To njech je tež prěnja kaznja wšěch serbskich kubłanišćow. Wone njejsu parkowanišća dwurěčnosće, ale stołpy serbskeje Łužicy.

Foto: A 4 blisko Budyskeho spjateho jězora

Wolić hić

Dźensa móžemy wolić hić. Snadź hladajo na nimale nazymske temperatury nic kaž ludźo z pjera Heinricha Zille. Wuhladach jich wčera w Maxa Liebermannowej wili napřećo swětosławnym Berlinskim přibrjóžnym kupjelam, załoženym před 110 lětami při wonym jězorje z wodu Habole.

Swoje prawo, zjawnje so kupać, je sej ludnosć němskeje stolicy brała, doniż njeje wyšnosć jej kupjele twariła. Potom přesadźachu krok po kroku přećiwo policiji kupansku modu po swojej woli, tež třiróžkate kupanske cholowy. Masy so kupacych mylachu ze swojim harowanjom bohatych susodow (tež Liebermanna), kotřiž so 1912 z protestnym listom wobarachu – podarmo.

Runje ludźo bjez wulkeho zamóženstwa dóstawaja prawo na postajenje swojeho žiwjenja jeničce na tutym puću: z nałožowanjom swojeho prawa. Dźensa směmy tež we Łužicy wšudźe so kupać, kaž nam so chce. A rozsudźić, štó ma kotru móc, ramik našeho wšědneho žiwjenja sobu postajować.

„Narodny duch“ serbskeho ludu – što to je? Dyrbimy dale zmylki worać!

Młody serbski swójbny nan mi praješe, zo je wón hladajo na nadawk „mojeho“ Domowinskeho wuběrka wćipny, što budźe „kubłanje w narodnym duchu“. Ja tež. Bohudźak je dosć čłonow kubłanskeho wuběrka, kotřiž su mudriši hač ja.

Njedawno twjerdźeše społnomócnjena zwjazkoweho knježerstwa za integraciju, knjeni Özoğuz, zo njemóžeš nimo rěče specifisku němšku kulturu identifikować. Tomu njepřihłosuju. Hdyž njeda so něšto z třomi zapřijećemi wopisać, njerěka to awtomatisce, zo wone njeeksistuje. Kóžda rěč ma swójski duch, a tohodla tča hižo w pěstowanju rěče korjenja specifiskeje kultury.

Z tym njeměnju předsudki abo klišeje, njech su pozitiwneho razu, kaž wo Serbach: Woni su hospodliwi, pobožni a rady spěwaja. So wě, zo je tohorunja Serbow, kotřiž so njemodla, njespěwaja a hosćej před chěžynimi durjemi najprjedy wumjetuja: „Čehodla njejsy do toho zazwonił a mje so prašał, hač docyła chwile mam?“ Wo tajke něšto njeńdźe. Dźe wo to, štož „lud“ wučinja, wšako my wo serbskim ludźe a nic wo serbskej ludnosći rěčimy. Njejsmy někajka „mjeńšina“ abo „ludowa skupina“, ně, smy serbski lud.

Tuta kajkosć „přisłušnosć ludu“ pak njeje ničo genetiskeho abo socialnje postajowaneho, ale suwerena wola Serbow. Jeli bychu so Němcy rozsudźili, jenož hišće němsce rěčacy přiwisnicy uniwersalneje (ameriskeje?) kultury być, móhli to wězo činić. Domowina bu w lěće 1937 wot nacijow zakazana, přetož nochcychu Serbja „serbsce rěčacy Němcy“ być. Ale Serbja, Słowjenjo. Strategojo hybridologije a 2plus su spytali, tón konflikt dwě generaciji pozdźišo tak rozrisać, zo so Serbja dobrowólnje do hybridneje „dwurěčnosće“ rozpušćeja.

Instrument je samsny kaž tehdom: wotstronjenje słowjanskeje wobchadneje rěče w zjawnym rumje. Ludźo smědźa doma serbować, ale w rjadowni a na šulskim dworje njech knježi němčina. 2plus je hišće zahubniši hač zakaz rěče ze stron nacijow: Tehdom běše wšěm Serbam wědome, zo maja so z domjacnym serbowanjom tutej nanuzowanej asimilaciji spjećować; dźensa so wróći wot nas samych organizowana asimilacija ze šulow domoj a dźěći praja za kuchinskim blidom „Altar“ a hižo nic wołtar.

So wě, zo je kónčin, hdźež je lědma maćernorěčnych dźěći, a tamle móže „měšany model“ so hodźace wuchadźišćo być. Ale jeli chcemy přichodnje lud wostać (běchmy, smy, budźemy!), potom ma so kóžde maćernorěčne dźěćo jako serbske (!) dźěćo rěčnje a kulturnje optimalnje spěchować – zhromadnje z towaršemi z druhich staršiskich domow, kotrež swojim dźěćom serbske kubłanje popřeja (je dosć radźenych tajkich přikładow tež po přewróće, hlej Schachtenec swójbu a druhe). Dotal wočakowanja tutych staršich wšudźe njespjelnjamy, dokelž přehusto so wučerjam posrědkuje, prošu jara ze serbšćinu we wučbje njepřehnawać. Tajke „přehnawanje“ pak na serbskej šuli njedawa.

A hdźe je wotmołwa na prašenje za narodnym duchom? Čitajće knihu Pawoła Roty „Z kameru a pisakom po Delanach“, potom wěsće, što běše narodny duch serbskeho wjeseneho ludu. To su naše korjenje. Kajka móhła ta serbska lipa srjedź 21. lětstotka wupadać, mamy dźensa w horšći. „Narodny duch“ njeje knjez w twjerdźiznje. Wón je mišter transformacije, hewak njeby serbski lud połdra tysac lět přez najwšelakoriše doby stawiznow pućować móhł. A tak póńdźe to dale.

Čehodla zmylki woramy? Zo bychmy z nich wukli a zo bychu naše přichodne zmylki inteligentniše byli hač prjedawše. Te dobre stare časy su wróćo hladajcy přeco tež zwrěšćene eksperimenty byli. To njepłaći jenož za NDR a 2plus. Wšo ma swój zmysł, k tomu słušeja tež nazhonjenja z 2plus. Dokelž njemylene płuwanje w jednorěčnym wotzamknjenym serbskim rěčnym rumje kaž hišće w połstatych lětach zašłeho lětstotka ženje wjac njezmějemy. Bjez zmylkow njeńdźe, dokelž su brachi z wuměnjenjom za wuwiće. Štóž chce perfektny być, bywa zastupjer stagnacije. A ta njetyje narodnemu duchej.