„ROZMOŁWA ZE SAKSAMI“ pola Serbow

Nowinska zdźělenka statneje kenclije w Sakskej

Ministerski prezident a předsyda Domowiny přeprošataj dnja 4. julija 2018 do Serbskeho doma

Drježdźany/Budyšin (26.06.2018) – Ministerski prezident Michael Kretschmer a Dawid Statnik, předsyda Domowiny – Zwjazka Łužiskich Serbow z. t. přeprošataj Serbowkow a Serbow na wuměnu idejow a mysličkow. Na rozmołwje w Budyskim Serbskim domje wobdźěla so tohorunja ministerka za socialne Barbara Klepsch, minister za ratarstwo Thomas Schmidt, justicny minister Sebastian Gemkow, minister za zwjazkowe a europske naležnosće a šef statneje kenclije Oliver Schenk, dale statni sekretarojo w hospodarskim ministerstwje Stefan Brangs, w nutřkownym ministerstwje Günther Schneider a w ministerstwje za wědomosć Uwe Gaul kaž tež prezident krajneho zarjada za šulu a kubłanje Ralf Berger.

„Ze sobu rěčeć je wažne za žiwu demokratiju a ciwilnu towaršnosć“, praji ministerski prezident Michael Kretschmer. „Tohodla su Rozmołwy ze Saksami za mnje a moje koleginy a mojich kolegow w kabineće stajnje wulke wobohaćenje, z kotrychž čerpamy mnoho nastorkow. Ze Serbowkami a Serbami do rozmołwy přińć, je mi wosebje wažne. Ja chcu sej jich ideje a prašenja naposkać, chcu zhonić, što woni kritizuja, što jich zaběra a kak so sami aktiwnje na wuhotowanju našeje towaršnosće wobdźěla. K tomu kóždeho wutrobnje přeprošam.“

Předsyda Domowiny Dawid Statnik: „Wjeselimy so, zo wotměje so tuta Rozmołwa ze Saksami w Serbskim domje. K wosebitosćam tutoho wječora słuša, zo móžeja wobdźělnicy swoje prašenja tež w serbskej rěči stajić, a to k wšěm temam, kiž jich w swojim wšědnym žiwjenju zaběraja. Wšitcy serbscy zajimcy su tohodla wutrobnje přeprošeni, tutu składnosć wužić, so na městnje, bjez přizjewjenja, z ministerskim prezidentom a dalšimi zastupjerjemi knježerstwa rozmołwjeć. Ja sym měnjenja, zo měli my tutu šansu na dialog wužić a jón z našimi naležnosćemi a nastorkami sobu postajeć.“

Wotběh:

19:00 hodź.: witanje a předstajenje wobdźělnikow

19:30 hodź.: rozmołwy při jednotliwych temowych blidach

20:30 hodź.: kónčna rozmołwa

Temy rozmołwow sahaja wot kubłanja, wěstoty, wobchada, hospodarstwa, wutwara spěšneje syće za internet, medicinu a socialne hač ke kulturje a wědomosći, financam, ratarstwu a wobswětej kaž tež justicy. K tomu zarjaduja so temowe blida, při kotrychž zetkaja so ministerki a ministrojo ze Serbowkami a Serbami k rozmołwje.

srjedu, 4. julija 2018,

započatk: 19:00 hodź. (zastup wot 18:15 hodź.)

Serbski dom,

Póstowe naměsto 2

02625 Budyšin

Přizjewjenja njejsu trěbne.

Prošu wužiwajće zjawne parkowanišća.

Zastupjerjo medijow su wutrobnje witani!

Čehodla dźěći serbować nochcedźa?

Tuchwilu žane zetkanje, žane kokanje bjez prašenja: Što je hłowna přičina za spad serbšćiny? To tole wšitcy wěmy: rozpušćenje rěčnych rumow. Zwučenosć twori bóle naše wašnje žiwjenja hač programy a kaznje. Hdyž so serbskim dźěćom na šulach přez měšane rjadownje wšědne serbowanje wotwučuje, njetrjeba so nichtó dźiwać, zo wone serbowanje za ničo normalne nimaja.

Rěčne rumy trjebaja jasne hranicy, kotrež přichadźacemu markěruja: Tu so serbsce rěči. Hdyž je pak tež na „serbskej šuli“ němčina z wobchadnej rěču, nastawa dźěćom ideal němcowaceho Serba. Wuslědk je, zo dźěći ze serbskich staršiskich domow zwonka Łužicy lěpje serbuja, dokelž tam je jeničce serbska swójba sama měritko za dobru serbskosć.

To woznamjenja za wozrodźenje serbšćiny we Łužicy: Pak my wopačne měritka za serbskosć zawěramy pak my je jako podpěru serbskeje swójby profilujemy. Po administratiwnym potłóčowanju „Chróšćan zběžka“ za serbskorěčne rumy w kubłanišćach před 17 lětami a zahajenju jich rozpušćenja přez 2plus w samsnym lěće je nětk alternatiwa: přewrót abo zahinjenje.

Hač do dźensnišeho njeje mi nichtó oficielne wobzamknjenje třěšneho zwjazka přećiwo serbskim rjadownjam předpołožić móhł. Hladajo na to, zo je Domowina zakonsce postajena zastupjerka serbskich zajimow, by to rěkało: 2plus je ilegalny. Nichtó njesmě so w postajowacych gremijach na zwoprawdźenju 2plus za serbske dźěći wobdźělić.

Na festiwalu dudakow 2018 w Slepom

Po witanju fararki Jadwigi Malinkoweje je čěska skupina „Lidová muzika z Chrástu“ w połnocy ludźi w Slepjanskej ewangelskej cyrkwi ze serbskimi spěwami zahoriła.

Přiłoha „serbskeho sejma“ w SN

Zo wutworjenje institucijow awtomatisce rozkćěw serbskeju rěče a kultury woznamjenja, hižo město Budyšin ze swojimi narodnymi templemi bjez wuprudźenja na dušu serbskeho ludu dementuje. Porno tomu njesubwencionowany serbski duch na wsach kćěje.

Nimo toho bych wam, lubi sejmikarjo, wjac prócy wo awtentisku serbšćinu přał – SN k tomu we wudaću z wašim wabjenjom šefredaktora Noweho Casnika, Gregora Wieczoreka, jako dobry přikład předstaja. Z potworami kaž „darowe wopodstatnjenje“ nas prošu přichodnje zalutujće – to je samsna grawoćiwa degenerowana běrokratiska serbšćina kaž w podłožkach Domowiny a Serbskeje rady 😎.

Widźiće, zo sym waše łopješko dokładnje a z wulkim zajimom dočitał 😊. Njetrjebamy „małe šule“, ale (małe) maćernorěčne serbske rjadownje. A hdźe sće „wotstronjenje katastrofalneho njedostatka wučerjow“ wotpisali? Kaž bu hižo w tutym blogu ze statistiku eksemplarisce dopokazane, mamy dosć serbskich wučerjow, ale woni njejsu wot šefow dosć na dobro serbskich dźěći zasadźeni.

To bě nětk, luby Měrćinje Wałda, w zmysle twojich „nakromnych myslow“ w samsnych SN: „Bjez kritiki njeje wěrnosće. Bjez wěrnosće njeje swobody a bjez swobody njeje měra.“ 😉 Jeli změjeće 3.000 wolerjow, by tuchwilna struktura delegitimowana była. Njebudu na wašej lisćinje, ale sym za wužadanje konkurency dźakowny.

Pirna móže, štož Budyšin njedokonja

Němscy šulerjo bilingualneho kubłanja Friedricha Schileroweho gymnazija w Pirnje maja jako maturanća tajki niwow wobknježenja čěšćiny, zo móža hnydom bjez problemow w Čěskej na uniwersiće studować. To wčera zhonich.

Na serbskim gymnaziju w Budyšinje Němcy wotpowědny niwow serbšćiny njedocpěwaja, a samo serbscy wotchadnicy maja so hustodosć rěčnje ćežko ze sorabistiku. To je znate. Potajkim w Serbach wočiwdnje wopačny kubłanski system knježi, kotrehož mjeno je 2plus.

Jeli so to bórze njewotstroni, njeby nam wjac wučerjow pomhało. Zmylk tči w systemje samym.

Sakska 2019

Wčera je krajny korespondent BILD w Drježdźanach prěnje woprašowanje ludźi w dobje ministerskeho prezidenta Kretschmera prezentował: Bychu-li přichodnu njedźelu wólby do Sakskeho krajneho sejma byli, by po tym jenož koalicija pak CDU/Lěwica pak CDU/AfD móžna była. Abo zwjazk štyrjoch (!) stron.

Što to za nas woznamjenja? Snadź budu so Chrysty Meškankoweje prašeć, z kotrejž smój w dospołnej přezjednosći štyri lěta wuběrk za politiske lobby-dźěło zwjazkoweho předsydstwa Domowiny nawjedowałoj? 😎

Dottore a Serbja

Swójba Wolfganga Lehmanna je dźensa Budyskemu serbskemu muzejej rysowanku „Serbska kmótra“ (na foće deleka) dariła – składnostnje zahajenja wustajeńcy, kotraž je hač do 19. žnjenca w Njeswarskim hrodźe přistupna. Po dźensnišim zahajenskim zarjadowanju Towarstwa přećelow kultury a domizny w Njeswačidle na połnje wobsadźenej žurli rozmołwjaštaj so Jurij Łušćanski, lawdator molerki Paule Lauenstein, a Bert (nalěwo), kiž běše 37 lět žiwjenski partner Wolfganga Lehmanna alias Dottore, lěkarja a molerja.

Twórby Lauenstein (1898-1980) a Lehmanna (1935-2009) so nětko składnostnje lětušeje 750. róčnicy załoženja Njeswačidła hromadźe prezentuja. Lauenstein bydleše sčasami we Wětrowje, Lehmann skutkowaše 1960-1964 jako lěkar w Njeswačidle a je tu hač do dźensnišeho woblubowany. Wonaj mataj jimacu zhromadnosć: zajim na znazornjenju dóńta chorych dźěći.

Dottore, kiž běše tež w Drježdźanskej chorowni fachowsce a psychologisce na legendarne wašnje spomóžny lěkar za dźěći, so w lěće 1984 do Hamburga přesydli. Jeho muž Bert, powołansce inženjer a priwatnje přisłušny za praktiskohospodarske přewodźenje wuměłskeho tworjenja Lehmanna, smědźeše hakle tři lěta pozdźišo do zapada sćěhować.

Mjeztym zo so na zahajenju wustajeńcy přitomny wjesnjanosta Gerd Schuster (CDU) samo zakonsce předpisanemu serbskemu popisanju radnicy, wot Koslowčanow wospjet zjawnje žadanemu, bjez rozuma wobara, maja swójbni Dottore cyle hinaši niwow. Hdyž při kofejpiću na parku z nami serbowaca swakowa po chwili měnješe: Nětk zdwórliwosće dla tola zaso němcować dyrbjeli, praješe Bert wjesele: Ně, wužiwajće tutu šansu, swoju rěč nałožować!

http://www.atelier-dottore.de/vita.htm

http://www.stadtwikidd.de/wiki/Paula_Lauenstein

Lay, Šołta, Dyrlich, Stange, Bělk, Hillmann za počesćenje Jurja Brězana w Budyšinje

W zjawnym lisće (hlej dataju) Budyskemu wyšemu měšćanosće a předsydam frakcijow měšćanskeje rady sej iniciatiwny kruh za počesćenje Jurja Brězana – Caren Lay, zapósłanča regiona w zwjazkowym sejmje; prof. dr. Dietrich Šołta, něhdyši direktor Serbskeho instituta; Benedikt Dyrlich, čłon Sakskeho kulturneho senata; Dietmar Stange, předsyda Turistiskeho towarstwa Budyšina; Jan Bělk, předsyda Zwjazka serbskich wuměłcow; Lutz Hillmann, intendant Němsko-serbskeho ludoweho dźiwadła – oficielne stajne spominanje na serbskeho spisowaćela žada. W spisu wšelake móžnosće namjetuja.

Offener Brief Würdigung Jurij Brӗzan.pdf

Nimamy přemało serbskich wučerjow

So wě, zo so nad wuspěchom Serbskeje rady za „bonus“ našim maćernorěčnym studentam wučerstwa na wšěch sakskich uniwersitach wjeselu:

https://www.mdr.de/serbski-program/rozhlos/aktualne-prinoski/audio-731440.html

To je w ramiku twjerdźenja, zo mamy dźensa hižo přemało maćernorěčnych wučerjow a zo nas za dźesać lět wulka katastrofa wočakuje, jeli wjele wjac nowych serbskich wučerjow njebudźe, dźěl rozrisanja problema. Ale swět hinak wupada, hač so wón na wšěch oficielnych zarjadowanjach wopisuje.

My nimamy přemało serbskich wučerjow. Ale wučerjo su wopak zasadźeni. Jenož jedyn jenički nazorny přikład: Na Radworskej serbskej wyšej šuli stej dwě třećinje kolegija wučerjow serbskej, potajkim někak 70 procentow. W přichodnym pjatym lětniku změjemy ca. 15 procentow maćernorěčnych serbskich šulerjow. Tež w druhich lětnikach je podobny podźěl. To pak woznamjenja:

Tež dołhodobnje by dosć a nadosć serbskich wučerjow za serbskich šulerjow było. A za někajku wariantu 2plus za Němcow a druhich. Tuchwilu pak statni a serbscy postajerjo kubłanskeje politiki wšěch šulerjow do jednoho 2plus-hornca mjetaja, hdźež serbske dźěći w faktisce němskorěčnej rjadowni sobu płuwać dyrbja, a potom so alarmistisce warnuje: Mamy přemało wučerjow, byrnjež to Serbow njepotrjechiło, ale jenož tón přeněmčacy system, za čož tak a tak dosć wučerjow měć nochcemy. Dokelž so wutworjenje serbskich rjadownjow wotpokazuje.

Dale a wjac serbskich wučerjow nam njepomhaja, hdyž so jich potencial tak za njeserbske naležnosće rozbroja kaž dźensa a hižo wjele lět. Nimo toho tute stajne warnowanje k tomu wjedźe, zo kwalita hižo rólu njehraje. Ja pak chcu jenož wučerjow měć, kotřiž dźěćom z dobrych serbskich swójbow zmylki do nastawkow nutř njekoriguja .

Gregor Gysi: Serbšćinu wšěm w Braniborskej, kotřiž serbsce wuknyć chcedźa!

Podpěru za wojowanje Kathleen Komolcyneje:

https://www.youtube.com/watch?v=GZrM8iU9Z_c&app=desktop